Ek is Donique van Schaik, en ek voel ewe tuis in Suid-Afrika as in Nederland. Ek dink en droom in Afrikaans, terwyl ek die Nederlandse kultuur en tradisies voluit omarm. Elke winter vlieg ek, nes die swaeltjies, terug na Afrika – met ’n leë tas gereed om gevul te word met inspirasie. Wanneer ek weer in Nederland aankom, herleef ek daardie skoonheid in my werk.

My inspirasie spruit uit die Suid-Afrikaanse blou lug, die rou teksture, poësie, en die plekke wat my voorvaders eens hul tuiste genoem het. Nederland bied op sy beurt ’n palet van eindelose groentone en dramatiese wolke. In my kuns verbind ek hierdie twee wêrelde – ’n dialoog tussen die Suid-Afrikaanse sonlig en die Nederlandse landskap.

Ek glo dat omgewings ’n diep invloed op ’n mens se gemoed het. Deur kuns kan ons ruimtes skep wat mooier, ligter en meer inspirerend is – en sodoende die wêreld om ons ’n bietjie beter maak.